一家四口!

呢個一定係我同Husb人生當中一個好好好難忘的一個星期～

我地的人生要轉變了～

睇番迪士尼的相，好似係一個世紀前的事咁...

12月4日至5日凌晨， Chuchus出世了!

星期三，Husb 出差到美國已經第三至第四日，因為太多Agent 電話，我話不如叫佢把電話漫遊關掉，係0個日凌晨，我發現出血，即刻打俾屋企人，坐的士到威院，我心入面只係諗，Chuchus, 你地唔係要出世吧，太早啦...

我去到醫院，已經係咁call husb, 發覺佢關左電話，Call 阿Paul, 再SMS, 醫生立即同我做檢查，發現宫頸已經好短，好大機會要生啦. 好彩husb 好快call back, 但係...我已經就送去產房..., 我同husb 好急咁講左大概情況...

我送去產房，不知所措，係咁喊, 有姑娘叫我唔好喊, 就快做媽媽...下...我做媽媽啦? 我未有心理準備，我的Chuchus 仲好細小...唔得架...

我去到產房，姑娘同我駁機，check 心跳，吊鹽水，check 宫縮... 因為BB如果出世都太細，開始打強肺針，每12小時一支，打4支...

我就一直訓係床，姑娘24小時私人看護咁睇住我，我一路望鐘，一路等Husb 回來，我知道...husb 一定心急如焚...立即改機票，都要等第二天的機，再坐十五個鐘機...成三十個鐘，都唔知點過...

終於husb 回來了，放心哂...

Chuchus 好叻，係我肚入面好活躍，陪我渡過左48小時，捱餓，又只可訓床的日子～

醫生見我情況好似好d, 又打完強肺針，終於俾我番病房，好野，我可以食番野，可以沖涼，可以訓得好d...Husb 日日都黎睇我，陪我...我以為Chuchus 係我肚入面，一齊住院，等到34週...

12月4日，下午，係床上穿水，醫生話如果ok, 都可以試下等到34週.
12月4日，晩上７點，開始肚痛。
２個小時內，子宫口已經開哂，醫生話要順產，我0個刻仲問，開刀得唔得呀，佢話趕唔切啦，如果第二個出的時候有問題先開刀，我都痛到唔知點，順就順啦～　
12月4日，5日，Chuchus 分别出世啦... 我生囡囡, 姑娘俾望左一眼，生完囝囝，冇望過就送左去nicu, 我生完，呆左...心入面好擔心好擔心...

我知道husb 見到我生完，係咁講話Chuchus 要靠自己...佢心都痛埋，但係佢好堅強，撑住個人，係我身邊～　

husb 即晩去nicu見到Chuchus, 佢打俾我，好positive, 但係原來佢番屋企都大喊一場～

我第二朝去見Chuchus, 心痛不得了，怪責自己之餘，又掛心佢地。

係醫院，我諗起佢地都會喊，完全control 唔到自己～

琴晩我番左屋企，我今日再去見Chuchus, 佢地都好努力呀，兩個都係可愛的babies, 我要積極，因為佢地需要我同Husb 的支持~

我唔可以成日喊，我地一家人都要努力!

I love you, love our Chuchus.